الاربعاء, 29 اكتوبر, 2008
مش عارف ابدأ بإيه وأقول ايه
ما علينا
يوم وانا قاعد في البيت لقيت جرنال فاستغربت لاننا معدناش بنشتري جرايد
المهم اني بحب اقرأ الجرايد اصلا فلقيت الجرنال ده(الجمهورية)فقلت وماله نقراه بعد فترة القطيعه اللي انا قاعته فيها
لأني مش بقرأ الجمهوريه من زمان جدا إلا يوم الخميس عشان مقال الدكنور محسن محمد اللي في آخر صفحه
قلت اشوف بقي الجرنال ده لأني مقرأتوش من زمان لقيته هو هو نفس العناوين ونفس الاستايل ونفس الاخبار الغير مثيره والغير مشبعه للقاريء
رميته وقلت اشوف الملحق الاسبوعي اللي هو دموع الندم
لقيت مانشيتات بتقول
دجال النساء يصورهن عرايا
صدمه في ليلة الدخلة
انجب طفلا اشقر فاتهم زوجته بالخيانه
اللعوب هربت مع زوج ابنتها
يعني
دي بقي شوية مانشتات اللي انا شفتها في اول صفحه بالبنط العريض وعلي فكره دا عدد قريب
يوم السبت 25 اكتوبر 2008
مش عارف يا جماعه ايه الحكايه كل اللي انا شفته في الملحق إما حاجات جنسيه او مخدرات
انا اعرف ناس كبيره والله بتجيب الجرنال يوم السبت عشان الملحق ده اهو بيثقفه برضه
يمكن بيحب قراءة الحاجات العبيطه دي
الموضوع استفزي جدا جدا
انا طول عمري بسمع عن الصحف الصفراء والعناوين امطرقعه انماا اول مره اشوفها بجد
كل حاجه اتجهت للأسوأ
جرنال بيقدم خدمه جميله للناس انا بعتبرها مش مواجهه للجريمه ولا حاجه بل بالعكس انا حاسس ان الحاجات دي مقصوده جدا تعليم الناس المصطلحات وتخليهم يقرأوا عن الجنس والمخدرات واهو كله بيعلم الناس المعاني الساميه اللي بيستخدمها اللصوص وتجار المخدرات
ليه كده ....ليه جرنال حكومي بيقول كده وكل الحاجات اللي فيه مش مفيده بالعكس دي مضره جدا جدا المفروض مش كل حاجه نركز عليها اوي كده يا جماعه
بصراحه بقت مكشوفه جدا جدا
الاعلام بيحاول يبوظ الناس ودا فعلا حصل وبيحصل انا مش متوقع ان الناس بقت كده راجل كبير والله راجل كبير بيطلب مني الملحق ده عشان يقرأه انا اتحسرت لأن الكلام ده والاعلام الفاسد وصل للناس الكبيره كمان
مبقتش عارف اعمل ايه ولا ايه كل اللي انا عملته اني قاطعت الجرنال ده وفيه ناس كتير جدا معايا
الاهرام الجمهوريه والاخبار وروز اليوسف وآخر ساعه والمساء
كل الافكار دي جت وانا ماسك الملحق ده في ايدي
رميته في الزباله وجبت الجرنال الرئيسي وقلت بدال ما ارميه اسيبه افرشه علي الارض احسن خسارة الفلوس اللي انا دفعهتا فيه والله.
يا خسارة تفكير الناس
أضف تعليقا
أضف تعليقا
<<الصفحة الرئيسية
