-اوعي تعتكف في الجامع الكبير

-ليه يا عم

-عشان مليان مخبرين يا خفيف

-طب وانا مالي يا عم

-ابقي قولهم كدا لما يمسكوك

-ومالوا اقولهم هي مشكله انا مش بعمل حاجه غلط

-ما هو عشان كده هيمسكوك

-عشان مبعملش حاجه غلط يمسكوني؟؟!! دا انت غريب

-اه والله هما عايزينك تعمل كل حاجه غلط وتفضل نايم

-يا عم انت بتهزر يعني هما هيعتكفوا معانا ويبلغوا عننا كمان تيجي ازاي دي؟

-شوف انت بقي بس دي نصيحتي اوعي تعتكف في الجامع الكبير ولا جامع .....(كذا)...ولا جامع ..(كذا)....

-يا عم سيبها لله

-مليش دعوة انا حذرتك عشان انت صاحبي يلا سلام 

ومشي من معايا وانا فكرت في كلامه

(كلام في سري)

ازاي يعتكفوا معانا ويبلغوا عننا لا طبعا دا كلام غلط ورجعت قولت لنفسي

طب ماهما لسه جايين الجامع قريب يمسكوا الخطيب .

وبعدين انا مش بعتكف إلا كل سنه مرة يا عم ومش بصلي في الجامع الكبير علي طول ومش ممكن حد يعرفني انا مليش دعوة بالاخوان ولا الناس اللي ليها في السياسه انا هعتكف يومين وخلاص

رجعت اقول لنفسي ان ده ممكن يبقي صح ولحسن حظي ان صاحبي لسه هناك اهو

ندهت عليه

يا.........

-بقولك ايه

-ايه تاني يا عم

-انت بتتكلم جد

-اه والله العظيم

-طب اقتعني كده عشان لو فيها ضرر ولاّ حاجه يا عم احنا برضه اصحاب

-بص يا عم الهندي فاكر لاضراب بتاع 6 ابريل

-اه فاكره بس مكنش ليا اي علاقه بيه انا سمعت عنه بس

-اهو الناس اللي عملت اضراب ومراحوش الشغل اخدوهم وحطوهم في السجن

-يا سلام ازاي دي

-اسمع بس الكلام لو قرأت الاخبار هتشوف

-يعني اخدوهم عشان مراحوش الشغل اليوم ده؟؟

-اه بالظبط

-بس احنا معندناش حد مشبوه ممكن يمسكوه احنا كلنا ناس ملناش دعوة إلا في الدقيق والسكر والشاي

-تعرف عمك.........

-اه ده راجل غلبان ملوش علاقي بحد

-يا غبي دا رئيس جماعة.........اللي عندك

-يا سلام

-طب وتعرف ............

-اه ماله ده كمان

-دا بقي لسه خارج من السجن امبارح راحوله الساعه 3 بالليل وهو نايم جنب مراته وخدوه يا معلم

- يا عيني حرام والله

-وعارف......وعارف.........وعارف..........

-المهم اني عارف كل ده بس بستعبط(كلام في سري)

-طب قولي بقي انت هتعتكف فين

-انا؟؟!!! والله منا عارف انا قشيت الايام اللي فاتت في البيت

-بس في الجامع احلي وافضل وكمان جو جميل ومكان روحاني وقرآن والناس حواليك كده احساس تاني خالص غير البيت

-طب وانا اعمل ايه انا خايف اروح الجامع

-مفيش جامع محدش بيراقبه

-لا فيه بس برضه متضمنش حاجه في الزمن ده

-اه عندك حق انا هعتكف في البيت يا عم

-ايوه خليك زيي واحذر

-بس انا مش خايف من حد انا برضه مش بعمل حاجه غلط وليا في السياسه ومش عاجبني حال البلد ايه الظلم ده حرام والله انا هكتب في مدونتي واقول كده لا بقي كفايا هنفضل كده لأمتي.؟؟؟

-ايه ده انت ليك مدونة؟

-اه طبعا

- يا راجل هات عنوانها ابقي ادخلها

-خد ..........................

- بس هتعجبك اوي

-لا دا انت كده تمام انا كان نفسي من زمان اشوف الشباب المناضل اللي زيك المتعلم بتاع النت

-اديك شفت يا سيدي

-بس متضمنش لازم تاخد بالك من بتوع امن الدولة دول في كل مكان

-لا ولا يهمك انا حذر اوي منهم

خلاص اسيبك في رعاية الله

يلا سلام

سلام

وطبعا معتكفتش في الجامع واخدت بنصيحة صاحبي اللي عمره ما يخدعني

وبعد كام يوم 

امن الدولة اخدني من البيت وقضيت ليلتين في السجن واتاكلت علقه مكن

-يلا يا روح امك انت افراج روح روح

-طب ممكن اسأل سؤال بس

-اسأل خلصنا الله يحرقكوا كلكوا

- هو انا جيت هنا ازي يا باشا دا انا مرحتش اعتكف زي ما صاحبي قاللي

- ماهو يا عبيط يا ابن ال........ صاحبك اللي بلغ عنك وعن مدونتك

خرجت بسرعه قبل ما حد يغير رأيه وكرهت صاحبي وكرهت السجن بس حسيت اني ليا صوت حد بيسمعه وحد خايف ان صوتي يطلع

فأهتميت بالمدونه وقلت والله منا شايلها

وادام القسم زعقت جاااااااامد

مش هشيلها يا باشا

وقلت يا فكيك